पुणे: महाराष्ट्र पर्यटन विभाग आणि सिम्पल स्टेप्स फिटनेस संस्थेच्या संयुक्त विद्यमाने भारतातील पहिली एव्हरेस्टिंग स्पर्धा सिंहगड किल्ल्यावर 13 डिसेंबर 2024 ते 15 डिसेंबर 2024 या कालावधीत आयोजित करण्यात आली आहे. या अनोख्या स्पर्धेत स्पर्धकांना माउंट एव्हरेस्टच्या 8848 मीटर उंचीच्या समकक्ष सिंहगड किल्ला 16 वेळा सर करायचा आहे.
स्पर्धेचे स्वरूप आणि पर्याय:
स्पर्धा दोन मुख्य गटांमध्ये विभागली आहे – पूर्ण एव्हरेस्टिंग (16 वेळा) आणि अर्थ एव्हरेस्टिंग (8 वेळा). याशिवाय नवोदितांसाठी पौर्णिमेच्या रात्री (14 डिसेंबर) एकदाच सिंहगड सर करण्यासाठी “फन रन/वॉक” पर्याय उपलब्ध आहे. स्पर्धक स्वतंत्ररीत्या किंवा टीम बनवून यात सहभागी होऊ शकतात.
सुविधा आणि नियम:
सर्व स्पर्धक घाट रस्त्याने सिंहगड सर करणार असल्याने स्पर्धेच्या कालावधीत सिंहगड घाट रस्ता (अत्यावश्यक वाहने वगळता) वाहतुकीसाठी बंद ठेवला जाणार आहे. स्पर्धकांसाठी टी-शर्ट, गुडी बॅग, रूट सपोर्ट, जेवण आणि वैद्यकीय सेवांची व्यवस्था केली जाणार आहे. यशस्वी स्पर्धकांना मेडल प्रदान करण्यात येईल.
बेस कॅम्प आणि कार्यशाळा:
पतंजली आत्मबोध वेलनेस सेंटर हे या स्पर्धेचे बेस कॅम्प व स्टार्ट पॉइंट असेल. स्पर्धेदरम्यान आरोग्यविषयक कार्यशाळाही आयोजित करण्यात येणार आहेत.
प्रमुख मान्यवरांची उपस्थिती:
10 डिसेंबर 2024 रोजी पुण्यात आयोजित पत्रकार परिषदेत महाराष्ट्र पर्यटन विभागाच्या उपसंचालक श्रीमती शमा पवार, वन विभागाचे उपवनसंरक्षक श्री. दीपक पवार, सिम्पल स्टेप्सचे संस्थापक श्री. आशिष कासोदेकर, ऍडव्होकेट प्रकाश केदारी (सिंहगड परिवार), आणि श्री. दिग्विजय जेधे (अध्यक्ष, वेस्टर्न घाट रनिंग फाउंडेशन) उपस्थित होते.
नोंदणीसाठी माहिती:
स्पर्धेत सहभागी होण्यासाठी इच्छुक स्पर्धक https://www.townscript.com/e/simple-steps-everesting-pune या लिंकवर नोंदणी करू शकतात.
या स्पर्धेमुळे पर्यटन आणि फिटनेस क्षेत्राला नवा आयाम मिळणार असून, सिंहगड किल्ल्याच्या ऐतिहासिक महत्त्वाला आधुनिक स्वरूपात अधोरेखित करण्यात येईल.
