ज्ञानोबा-तुकाराम’च्या जयघोषात संतश्रेष्ठ ज्ञानेश्वर माऊली आणि जगद्गुरू संत तुकाराम महाराज पालखींचे पुण्यात स्वागत..

पालखी आगमनाने पुणे विठ्ठलमय; महापौरांकडून औक्षण, वारकऱ्यांसमवेत फुगडी…

सत्यउपासक/पुणे: आषाढातील रिमझिम सरी, टाळ-मृदुंगाचा अखंड निनाद, भगव्या पताकांनी दुमदुमलेले रस्ते आणि लाखो कंठातून घुमणारा ‘ज्ञानोबा-तुकाराम’ चा जयघोष… अशा भक्तिमय वातावरणात पुणे शहराने आज संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालखी सोहळ्यांचे उत्स्फूर्त, भव्य आणि भावपूर्ण स्वागत केले. अवघे पुणे शहर विठ्ठलमय झाले असताना वारकरी संप्रदायाच्या भक्ती, समता आणि सेवाभावाच्या परंपरेचे पुणेकरांनी जल्लोषात स्वागत केले.

 मा.महापौर मंजुषा दीपक नागपुरे यांच्या संकल्पनेतून राबविण्यात येत असलेल्या ‘पुणे प्रथम-सेवावारी २०२६’ उपक्रमांतर्गत दोन्ही पालखी सोहळ्यांचे पारंपरिक पद्धतीने औक्षण करून पुष्पवृष्टी करीत स्वागत करण्यात आले.

संतश्रेष्ठ ज्ञानेश्वर माऊली आणि जगद्गुरू संत तुकाराम महाराज पालखीचे मा.महापौर सौ.मंजुषा दीपक नागपुरे यांनी भक्तिभावाने औक्षण करत स्वागत करत पादुकांचे दर्शन घेतले. यावेळी त्यांनी वारकरी बांधवांशी संवाद साधत त्यांच्या भावना जाणून घेतल्या. टाळ-मृदुंगाच्या गजरात आणि विठ्ठलनामाच्या अखंड जयघोषात वारकरी महिला भगिनीं समवेत फुगडी खेळत त्यांनी वारीतील आनंद, उत्साह, समता आणि सेवाभावाचा संदेश प्रत्यक्ष कृतीतून अनुभवला!

यावेळी मा.उपमहापौर परशुराम वाडेकर, विरोधी पक्षनेते ॲड. निलेश निकम, राष्ट्रवादी गटनेते सोपान चव्हाण, पक्षनेते नितीन गावडे, मा.आयुक्त श्री.नवल किशोर राम, मा.अतिरिक्त महापालिका आयुक्त (विशेष) श्री.ओमप्रकाश दिवटे यांच्यासह स्थानिक नगरसेवक, पुणे महानगरपालिका अधिकारी व कर्मचारी तसेच स्थानिक नागरिक व वारकरी भाविक भक्त मोठ्या संख्येने उपस्थित होते.

याप्रसंगी पुण्यनगरीच्या महापौर मंजुषा नागपुरे, म्हणाल्या,

संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालख्यांचे पुण्यात आगमन हा प्रत्येक पुणेकरासाठी अभिमानाचा आणि भाग्याचा क्षण आहे. दोन्ही पालख्यांचे औक्षण करून स्वागत करताना आणि वारकरी भगिनीं समवेत फुगडी खेळताना वारीतील समता, भक्ती आणि आनंदाचा विलक्षण अनुभव घेता आला. वारकरी बांधवांची सेवा हीच संतसेवा मानून पुणे महानगरपालिकेचे सर्व विभाग ‘पुणे प्रथम-सेवावारी २०२६’ अंतर्गत अहोरात्र कार्यरत आहेत. स्वच्छता, आरोग्य, पाणीपुरवठा, सुरक्षा यांसह सर्व सुविधा उपलब्ध करून देण्यात आल्या असून संतांनी दिलेला समता-बंधुतेचा संदेश अधिकाधिक लोकांपर्यंत पोहोचविण्यासाठी आम्ही कटिबद्ध आहोत.

पुणे महानगरपालिका आयुक्त नवल किशोर राम म्हणाले;

आषाढी वारी हा केवळ धार्मिक सोहळा नसून, लाखो वारकरी भाविकांना आवश्यक नागरी सेवा सक्षमपणे उपलब्ध करून देण्याची मोठी जबाबदारीही आहे. ‘पुणे प्रथम-सेवावारी २०२६’ अंतर्गत महानगरपालिकेच्या सर्व विभागांनी नियोजनबद्ध पद्धतीने समन्वय साधत स्वच्छता, पाणीपुरवठा, आरोग्य सेवा, तात्पुरती स्वच्छतागृहे, विद्युत व्यवस्था, अग्निसुरक्षा, आपत्कालीन प्रतिसाद आणि नियंत्रण कक्ष यांसह सर्व सुविधा कार्यान्वित केल्या आहेत. प्रत्येक वारकऱ्याला सुरक्षित, स्वच्छ आणि सुसज्ज वातावरण उपलब्ध करून देण्यासाठी प्रशासन पूर्ण क्षमतेने कार्यरत असून, पारंपरिक सेवाभावाला आधुनिक व्यवस्थापनाची प्रभावी जोड देण्याचा आमचा प्रयत्न आहे.

‘पुणे प्रथम-सेवावारी २०२६’ या उपक्रमांतर्गत वारकरी भाविकांसाठी पालखी मार्ग आणि मुक्काम स्थळांवर स्वच्छता, पिण्याच्या पाण्याची व्यवस्था, तात्पुरती स्वच्छतागृहे, वैद्यकीय सेवा, प्रकाश व्यवस्था, अग्निसुरक्षा, आपत्कालीन प्रतिसाद पथके, नियंत्रण कक्ष आदी सर्व सुविधा उपलब्ध करून देण्यात आल्या आहेत. पुणे महानगरपालिकेचे सर्व विभाग वारकरी भाविकांच्या सेवेसाठी समन्वयाने कार्यरत आहेत.

संतांनी दिलेला समता, बंधुता, सेवा आणि मानवतेचा संदेश समाजापर्यंत पोहोचविण्याच्या उद्देशाने राबविण्यात येणारा हा उपक्रम पारंपरिक श्रद्धेला आधुनिक व्यवस्थापनाची प्रभावी जोड देत आहे. दोन्ही पालखी सोहळ्यांच्या स्वागतातून पुणे शहराने वारकरी संप्रदायाप्रती असलेली आपली श्रद्धा, आपुलकी आणि सेवाभाव पुन्हा एकदा अधोरेखित केला.

१० जुलै रोजी सामूहिक ऑनलाईन पसायदान पठण

संतश्रेष्ठ ज्ञानेश्वर माऊलींच्या पसायदान या विश्वप्रार्थनेचा संदेश जगभरातील भाविकांपर्यंत पोहोचविण्या साठी मा.महापौर सौ. मंजुषा दीपक नागपुरे यांच्या संकल्पनेतून १० जुलै२०२६ रोजी रात्री ९.०० वाजता सामूहिक ऑनलाईन पसायदान पठणाचे आयोजन करण्यात आले आहे. विश्वबंधुत्व, मानवता आणि विश्वशांतीचा संदेश देणाऱ्या या उपक्रमात देश-विदेशातील भाविक डिजिटल माध्यमातून सहभागी होऊ शकणार असून, त्याचे थेट प्रक्षेपण www.punepratham.org या संकेतस्थळावर करण्यात येणार आहे.